terça-feira, 29 de maio de 2007

O BNG: salsa agridoce.


Escribo este comentario porque vexo a moita xente que non atopa explicación aos resultados do BNG no Grove, no Salnés e no conxunto do país. Sen querer erixirme en ningunha caste de oráculo deixovos a miña explicación. No caso do Salnés ( e no Grove) o BNG perde apoios claramente sendo as pérdidas menores no Grove e clarísimas en Vilagarcia ou Cambados. O problema principal do BNG no Salnés é o mesmo que o do BNG no conxunto das cidades, o seu perfil unidimensional. O BNG pasou de ter unha gran actividade na rede social a ter unha actividade moi reducida. Só hai que ver como están organizacións como os CAF-CAE ou Galiza Nova ou moitas asoaciacións culturais ou plataformaas vencelladas ao nacionalismo. Nas cidades o BNG xogou nestes últimos 8 anos as súas cartas case exclusivamente ao traballo institucional. Nas cidades o bipartidismo estatal é máis claro pola importancia dos medios de comunicación á hora de reflectir ese traballo institucional e aí o BNG xoga en franca desventaxa pola falta de medios de comunicación propios. Este é un problema vello pero antes o nacionalismo contaba cunha gran rede social que equilibraba a balanza e hoxe esa rede social está nun dos seus peores momentos. No Salnés o perfil institucional do BNG é marcadamente claro e a carencia dunha rede social alternativa tamén, así ten moi dificil avanzar e consolidar un espazo propio fronte a un PSdeG que só realiza traballo institucional pero que conta co apoio da maioría dos medios de comunicación. O BNG meco realizou un gran traballo institucional pero segue sen crear unha rede social e cultural efectiva que poida profundizar na sociedade meca e recabar apoios entre os votantes do PSdeG ou mesmo do PP. Se vemos o conxunto do país esto queda ainda máis claro pois nos municipios onde se acadan resultados impresionantes o BNG foi quen de artellar unha rede social moi forte, por exemplo o caso de Teo. Voltar ao traballo social é prioritario para o BNG que se non ten moi dificil marcar un espazo propio fronte ao PSdeG. En todo caso a resaca electoral é agridoce como a salsa chinesa xa que fronte ao desastre nas cidades o BNG acada arredor de 30 alcaldías e aumenta o seu número de concelleiros, ademais tamén foi quen de recuperarse da forte caida que sufrira nas autonómicas, freando así a caida en barrena dende a marcha de Beiras. Agora ben, a aposta polas vilas funcionoulle ben pero o castigo nas cidades foi altísimo polo que tamén terá que reflexionar moito sobre a razón deste castigo e da perda de votantes no tradicional caladeiro da xente nova. No caso do BNG de Ogrobe debe manter o seu poderío institucional pero debe facerse moito máis visible fora do concello, achegando máis as súas propostas á cidadanía e comezando a mover un pouco o tecido social meco que está totalmente durmido. Un exemplo: se sacamos o PXOM cando foi a última vez que vimos manifestacións, campañas ou recollidas de firmas neste noso municipio?

12 comentários:

Panaide disse...

Estou totalmente de acordo co teu artigo,ainda que nas cidades o BNG perdeu unha gran representación de votantes (vexase o caso de Pontevedra),tamén é verdade que noutros concellos o seu numero de concelleiros aumentou notablemente.
Neste caso de Ogrobe se o BNG pretende chegar a un sector máis amplo da población debería pensar en plasmar máis as súas iniciativas no ambito (como ti moi ben dixeches) foraneo ó Concello.Porque se é verdade que dentro del está tendo un papel notable ata o de agora na oposición,os únicos que se enteran deso son os que xa son afíns o partido e non o resto da cidadanía a que se pretende chegar...

Panaide disse...

Porcerto un apunte antes confundinme ó poñer a identidade do comentario.... Panaide=Mac4 ;)

Anónimo disse...

Probablemente o Benegá local soubo chegar á cidadanía pero o cabeza de lista non é o máis axeitado visto que o pobo se deixa levar por rumoloxías, estigmas que lle puxeron e topicazos derivados dunha vida privada que deberían ser obviados. Sendo así probablemente haxa que traballar sobre ese pobo con ofertas concretas á hora de presentar mocións e demostrar interese real polo ben da veciñanza, pero non nos debemos enganar: o que se plantexa nun pleno case que non trascende; é dicir, aquelo que o Benegá plantexe nos plenos, facelo saber, explicalo, facelo público para os propios e para os alleos, que se sepa que o Benegá está aí, traballando polo interese dos veciños de Ogrobe.
Dito queda. Vos veredes, meus amigos...

Escévola disse...

Totalmente de acordo con vos. Fora do candidato en cuestión gran parte do problema é que moitas das iniciativas do BNG non trascenden máis aló da súa militancia ou da súa base social máis cercana. É aí onde radica a importancia de crear un tecido social e asociativo forte e é aí, ao meu ver, un dos grandes problemas do BNG no Salnés.

Anónimo disse...

Efectivamente: É preciso estar na vida social e non so no Concello. Seguramente, no caso de participar no goberno municipal, é importante ter repercusión social -Estará ben que se fagan estas reflexións en público?-. Sen embargo é preciso9, xa desde agora que o Comité Local teña traballo e trascendencia públicas, cun funcionamento real, con presencia entre a xente e con incidencia social.

O BNG a nivel comarcal é un reducto de funcionarios que so se dirixen -pouco e mal- á militancia. Hai que empezar a traballar, a ter incidencia na vida real.

Panaide disse...

E agora que me decato,porque non entramos a falar tamén desas 3000 e moitas persoas que este ano non foron votar,¿¿cambiaría algo o panorama actual da Politíca de Ogrobe??.

Anónimo disse...

Preocúpame que no Benegá non haxa máis debate que aquel que fala de se o candidato é ou non é o que ten que ser, de qué pasou para que nos gañe o Psoe ou ou PP, que se perdemos quince votos na mesa de Virxe das Mareas ou doutras cuestións de mero electoralismo, ou de simple municipalismo. A marca da casa, o que nos ten dado progresión na confianza da xente, o que nos trouxo ata os niveis de responsabilidade política que temos hoxe (impensables hai vinte anos) é que somos diferentes, que para ben e non para mal, NÓS temos ideas, ideoloxía, sentimento de País en construción, vontade de autoorganizar aos galegos e ás galegas, formación teórica e debate de argumentos. E eso vai sendo progresivamente sustituído polo espellismo de concorrer electoralmente contra máquinas de facer cartos e votos.
Se esquecemos cal é o noso obxectivo principal, facendo as análises só en termos de reconto de votos e non reforzamos a nosa base social con achegamento e baños de ideas, se non lle arrimamos á nosa militancia medios e formación, pois seremos unha pobre caricatura dos partidos que se alternan nos gobernos, nun estilo de turnismo pouco desexable. O Benegá local precisa recuperar esa dinámica, a que nos proporciona unha base leal, permanente, segura: con ideas de identidade nacional; con novas maneiras de comunicarnos e estar ao lado da xente, non só nas dúas semanas da campaña; cun claro reforzamento da estrutura organizativa, que non funciona, nin sequera no período electoral. E nesa perspectiva o asunto do liderato é unha cuestión menor, que se resolve como a mazá cando madura, cae polo seu peso.
Permitídeme un final provocador: se fixeramos un exame de coñecemento das ideas fundamentais do nacionalismo galego, entre os simpatizantes desta organización o resultado sería, ou non? de suspenso xeral. Pois eso, que o sistema, español e cervantino, non nos faga ver muíños de vento onde en realidade hai xigantes, ou era ao contrario?
Cando comezamos con esta organización tiñamos tres referentes nos que soportar as nosas aspiracións: FRONTE POLÍTICA, FRONTE CULTURAL e FRONTE SINDICAL... que fomos deixando polo camiño, modificando a Política, polo electoralismo; a cultura pola desidia, e o sindicalismo pola desmobilización. E puxémonos, case todos, a contar votos... que non sementamos.

Anónimo disse...

Concordando no fundamental co comentario de Anton Mascato non deberamos esquecer tamen que van ala 28 anos dende as primeiras eleccions nos concellos apos a ditadura. Que nestos 28 anos unhas veces mais outras veces menos o BNG estivo sempre ahi, moitas veces traballando para o inglés, e que é de humanos o querer algunha vez ter un recoñocemento polo traballo feito. Sobre todo cando che toca ver, unha e outra vez como os recompensados non son precisamante "os rapazes que millor fixeron os seus deberes". E porque o tempo vai pasando e os que fai 28 anos tiñamos 16 anos agora temos 44 , unha hipoteca, traballo por contrato e fillos.
De todolos xeitos, sei que seremos de novo quen de organizarnos millor, meternos mais na sociedade (nas organizacions sociais), ser mais disciplinados e sobre todo, como din os portugueses, APRENDER, APRENDER, APRENDER SEMPRE. Sobre todo, porque este pobo, esta xente, este pais o demanda.

Panaide disse...

Igualo o problema de base do BNG é o de mirar "por e para" a militancia e non a de intentar chegar o resto da cidadanía con información interesante do que se pretende conseguer,tanto política como social e culturalmente.
A militancia de base xa debería saber que é polo que se está a traballar,pero de igual forma debería plasmalo no conxunto dunha sociedade marcada por "bulos,mitos e lendas" dun partido "demonizado" polo resto de formacións políticas do Pais

Anónimo disse...

Penso que en xeral todos ou case todos os partidos se centran na súa militancia á hora de informar do que sea fai ou se deixa de facer, e mesmo cara á propia militancia non se di todo o que se podería ou debería.
Igual é cousa de plantexarse seriamente chegar a todos os cidadáns, informando non só do que poidan ser liñas programáticas (que adoita ser tema manido), senón do que é o día a día na loita por defender os intereses da xente e o que o Benegá pode aportar e aporta, e que a meirande da xente e incluso dos propios militantes nin se entera. Deste xeito unha campaña non dura 15 días, senón catro anos.

Anónimo disse...

Concordo com Antón Mascato em que o BNG tem ideas, ideologia, sentimento de país, etc.

Concordo também em que nom todo o BNG (e o caso de Ogrove é claro) tem o mesmo perfil, e que nom só os simpatizantes carecem desses elementos, mas também pessoas principais da lista eleitoral.

É de criticar que membros 'altos' do BNG escrevam colunas no Diario de Arousa em espanhol, e que outros tenham umha idea de naçom totalmente contrária à que tradicionalmente defende o BNG.

E assim sucessivamente.

Nom podo deixar de concordar, claro, com as opinions que dim respeito ao trabalho sócio-cultural em Ogrove: só tenho consciência de umha festa na Praça de Arriba hai uns meses, mentras desaparece o S. Joám, as festas dos bairros, o uso do trompo...

Anónimo disse...

A Voz de Galicia de hoxe, primeiro de xuño, publica a noticia da intervención da Brigada de Delictos Urbanísticos no Concello de O Grove, con indicios razonables de senllas corrupcións urbanísticas que atinxen a responsables do goberno municipal e a determinados traballadores do noso Concello. Todo esto, por suposto, presuntamente e sen esquecer que as persoas son inocentes mentres non se demostre que son culpables, e para eso está a Xustiza, á que por fin acudimos.
Eu quero hoxe recordar que foi o Bloque Nacionalista Galego, dende hai varias corporacións, quen máis ten insistido nas denuncias, en Plenos, en medios de comunicación e diante da Administración, e quen mais ten insistido na necesidade de perseguir a especulación e as prácticas de corrupción.
Por esa razón quero ter unha lembranza moi especial para compañeiros e compañeiras que o traballaron, que o padeceron e que agora poden empezar a disfrutar dun traballo político continuado e moi ben feito; porque foi xente como Fuentes, Manolo Mascato, Luís Rei, Xesús María González, Luís Lamelas, Xosé Manuel Domínguez, Lina Álvarez, Xosé Manoel Pérez Dadín, Rosa Castro, Luís Chan Lamelas e outros moitos, e moitas, que non cito e que son igualmente valiosos nese traballo de denuncia, de intervención. Especial mención para a señora Carmen Castro, de San Vicente, exemplo dunha vida enteira entregada á mesma loita veciñal, anticaciquil e pola conservación do territorio, como xa dixemos, ata ten dereito a equivocarse, porque sempre contará no Benegá co noso cariño e co noso máximo respecto. Louvanzas a eles e a elas. Ao resto dos militantes e simpatizantes, pedirlles que non renuncien á dignidade, que o futuro é dos que saben manterse de pé, dos que non dobran os xeonllos da humillación.